Македонска Искра

Ѓорѓи Митревски е Македонец, роден во селото Подмочани, Преспа. Негова специјалност се славистика и англиски јазик и литература.

Македонска Искра: Каква е заинтересираноста за македонскиот јазик во Америка?

Џорџ Митревски : Колку што знам, за македонскиот јазик нема баш толку интерес. Има интерес кај деца од македонско потекло и кај студенти по славистика, кои се должни да изучуваат втор словенски јазик.

Македонска Искра: Според вашето искуство, кое е вашето мислење за образовниот систем во Македонија?

Џорџ Митревски: Школскиот систем во Македонија не ми е баш толку познат. Повеќе ми е познат системот во високото образование. Мислам дека, за жал, нема големо унапредување во високото образование во последните 20 години. Болоњскиот процес се применува само формално. Нема вистинска желба за промени во системот ниту од владата, ниту од професорите. Повеќето професори мислат дека македонскиот систем е еден од најдобрите во светот и затоа нема потреба за промена. Така тие биле образовани, на тој систем работале со децении и на тој сисем се навикнале. За жал, студентите немаат можност да го вкусат вистинскиот начин на високо образование во развиените земји. Односот помеѓу студентите и професорите просто речено е ужасен. Пасивноста на студентите е исто за жал. 

Македонска Искра: Какви се вашите впечатоци од конференециите за македонскиот јазик, фолклор и идентите во Охрид каде сте чест гостин ?

Џорџ Митревски: Конференциите во Охрид се организирани одлично. Мислам дека има огромна потреба за вакви средби, кои им даваат на македонските и странските професори можност да се сретнат и да разменуваат мислења.

Македонска Искра: Дали сте учествувале на други светски манифестации?

Џорџ Митревски: Сум учествувал на безброј конференции низ светот и низ Америка. Само на ваков начин професор може да биде во тек на истражувањата на колеги. 

Македонска Искра: Во вашите дела доста простор има и за македонскиот фолклор, дали е тоа некоја носталгија кон родниот крај?

Џорџ Митревски: Она што го работам јас, од македонистиката, е повеќе собирање на ресурси на материјали за потребите на специјалисти - лингвисти, отколку изучување на тие материјали. По професија не сум ни лингвист, ни фолклорист. Собирањето на материјали е макотрпна работа, но без нив немаат специјалистите што да истражуваат. Оваа работа во Македонија е заборавена во последните 20 - 30 години. Замислете, со што би се бавеле фолклористите, ако не се заложил Марко Цепенков да го собере целиот тој материјал? Моментално Македонија е единствена земја во Европа што нема свој корпус на македонски текстови, без кои тешко се изучува сегашната состојба на македонскиот јазик и без кои не е можно да се пишува толковен речник. 


Македонска Искра: Што мислите за негаторската политика на соседите во врска со македонскиот јазик и фолклор?

Џорџ Митревски: Во врска со негирањето на македонскиот јазик и фолклор, тоа треба да се гледа од неколку гледни точки. На сите научни конференции, каде јас сум учествувал, нема недоразбирање за тоа што е македонско, бугарско или грчко, бидејќи вистински интелектуалци ги изучуваат тие проблеми на вистински научен начин. Политичарите и псевдо интелектуалците имаат сосема друга цел кога зборуваат за јазикот и фолклорот, па меѓу нив се раѓа таа негаторска политика. Интересно е што ние зборуваме за негаторската политика на соседите према нас, а не обрнуваме внимание на нашата негаторска политика према соседите, како да не постои. Јас лично не разликувам помеѓу наши и нивни политичари и псевдо интелектуалци, бидејќи сите од сите страни ја имаат истата цел.

Македонска Искра: Што можеме да очекуваме во иднина од ваша страна?

Џорџ Митревски: Би сакал да придонесам со сè што можам за унапредување на високото образование во Македонија, со критики и со понуди.

Редакцијата на Македонска Искра му се заблагодарува на господинот Џорџ Митревски за направеното интервју.